خطوه بخطوة ازاى تجهز ورق تأشيره الشنجن بنفسك

خطوة بخطوة ازاى تجهز ورق تأشيرة الشنجن

أهم مرحله عند التقديم للحصول على تأشيره هي تجهيز ورقك بشكل مظبوط ولائق علشان السفارة تقبله وتوافق على التأشيرة لازم الاول تحجز ميعاد فى السفاره عشان تقدم ورقك, وكل سفارة من سفارات الشنجن وليها طريقة ,لحجز ميعاد فيها

بشكل عام فى 3 طرق تقدر من خلالهم تحجز ميعاد فى السفاره :

1/ اسهل واسرع طريقه هى بالتليفون, من خلال خدمه بتقدمها فودافون, كلم 2101 من اى موبايل أو 090070678 من أى خط أرضى- (ليست متاحه لكل السفارات ) .

نصيحه : سعر الدقيقه 5 جنية فلازم تجهز قبل المكالمه رقم جواز السفر وتاريخ انتهاء صلاحيته و نوع الفيزا عشان هتتسأل عنهم فى المكالمه.

2/ الطريقه الثانية هى الحجز مباشرة عن طريق السفارة ويتم ذلك بالذهاب الى السفارة المطلوبه يوم محدد من كل اسبوع حسب نظام كل سفاره.

3/ الحجز عن طريق شركات وسيطه, فى سفارات مع شركة تقديم اسمها TLS وسفارات تانية مع شركة اسمها VFS

ملحوظه: التقديم بيكون بحد اقصى ٩٠ يوم قبل السفر، يعني ما ينفعش تقدم قبل السفر بأكتر من ٣ شهور.

---

اما بالنسبه لاهم الاوراق المطلوبه:

1/ استمارة التقديم

ده لينك الاستمارة باللغه الانجليزيه تقدر تحملها من خلاله , قم بتحميلها وقرائتها بعنايه وملء البيانات, و لو عايز نسخه مترجمه من الاستمارة باللغة العربية اكتب تعليقك فى اسفل الصفحه وسنرسلهالك مجانا

, اهم حاجه خلى بالك لما تحدد تاريخ السفر ودخولك وخروجك فى التأشيره , عشان المفروض بعد كده هتجيب حجوزات لفنادق وتذاكر طيران فى المواعيد دى.

2- جواب العمل HR Letter

جواب العمل هو إثبات رسمي يتم استخراجه من جهه العمل لتقديمه للسفاره كاثبات انك موظف بتشتغل فى المكان الفلانى و بتشغل الوظيفه الفلانيه بالمرتب الفلانى حتى تاريخه, ويعتبرمن اهم المستندات الي بتقدمها للسفارة علشان تثبت ان عندك وظيفة ومصدر دخل شهري ثابت, مفيش صيغة ثابتة للجواب، لانها بتختلف من شركة للتانيه، ولكن اهم شئ يكون على letter head من الشركة ومختوم بختم الخاص الشركة.

واهم البيانات اللى لازم تتكتب فى HR Letter هى :
– تحديد الوظيفه – تاريخ التوظيف – المرتب الشهري – الرقم التأمينى (مع ارفاق شهاده التأمينات الاجتماعية) – تاريخ السفر المتوقع والموافقه من الشركه على الاجازه فى حالات السفر للسياحة وضمان الرجوع مره اخرى للعمل, اما فى حالات السفر للهجره فبيتم تحديد سنوات الخبره – وبعض البيانات عن الشركه مثل رقم السجل تجاري والبطاقه الضريبيه الخاص بهم للتأكد من صحه وجود النشاط التجارى.

اما لاصحاب الشركات والاعمال الخاصة:يتم تقديم السجل التجاري، والبطاقة الضريبية، وميزانيه الشركة مختومة من مراجع قانوني لاثبات وجود شركة حقيقية قائمة بالفعل. كل هذه المستندات يجب ان تقدم للسفارة مترجمة فى مكتب ترجمة معتمد.

3- كشف حساب بنكى لاخر 6 شهور

تطلب كافة السفارات الأوروبية كشف حساب بنكي من كل شخص يطلب فيزا شنجن لذلك يعتبر كشف الحساب البنكى هو من اهم طلبات السفارة، والغرض منه لاثبات وجود دخل شهري ثابت وقدره ماديه لمتطلبات السفر, اهم حاجه فى كشف الحساب البنكى انه يكون فيه معاملات مختلفه من سحب وايداع وحركه شهرية كتيرعلى مدار ال6 شهور الاخيره, ولازم تكون جميع البيانات فى كشف الحساب البنكى باللغة المطلوبه فى السفاره الاسم والعنوان وختم البنك – او يتم ترجمتهم فى مكتب ترجمة معتمد.
ويحذر من وضع مبلغ مالى كبير دفعه واحده فى كشف الحساب فى يوم محدد وباقى الشهور خاليه من المعاملات, لان موظفين السفاره فاهمين كويس أوي من كشف الحساب الفلوس دي اتحطت أمتى بالظبط و هل فعلا المبلغ ده عليه سحب و ايداع لمدة 6 شهور و لا محطوط فقط للحصول على الفيزا

لو عايز تعرف اكتر عن تفاصيل ازاى تقدم كشف حساب بنك مظبوط ومقبول للسفارة اضغط هنا

4- حجز مبدئي لتذاكر الطيران

يجب ان يكون حجز الطيران بالمواعيد المحدده والمكتوبة في استمارة التقديم. يمكن حجز الطيران من خلال الانترنت او من خلال شركات الطيران, وايضا شركات السياحة تقدم خدمه حجز الطيران للتقديم على تأشيره, ويجب ان تكون جميع مواعيد الحجوزات موحده و مطابقه لما مكتوب فى استماره التقديم مع جواب HR Letter وجميع المستندات اللى بتقدمها .

5- حجز مبدئي للفندق

يجب ان يكون حجز الفندق واقعى وفى حدود امكانيات كشف الحساب البنكى المقدم للسفاره ليتم قبول التأشيرة, ويوجد العديد من المواقع اللى بتقدم خدمه حجز الفنادق مثل booking.com و hostelworld.com او حجز في شقة من خلال موقع airbnb.com لو الامكانيات الماديه اقل من الحجز فى فندق

6- التأمين الصحي

تقريبا اغلب شركات التأمين فى مصر بتعمل تأمين السفر. ولازم التامين يغطي فترة التاشيرة المطلوبة. يعني لو مقدم على رحلة اسبوعين، بتعمل تأمين عشر ايام او شهر. لو بتقدم على سنة، في سفارات كتير بتكون كاتبه أسماء محدده لشركات تأمين لمجرد الاقتراح مش اكتر لكن طبعا بتقبل وثيقه التامين من اى شركه عادى,وكمان قدام كل سفارة هتلاقي مندوبين شركات تامين بيعملوا تامين السفر.

7- شهاده التحركات

من اهم الشهادات اللى بتوضح تاريخ السفر الخاص بك هى شهادة التحركات وﻫﻲ شهادة ﺗوضح تحركات ﻃﺎﻟﺒﻬﺎ ﻣﻦ سفر ﻣﻦ و إﻟﻰ البلاد ﻓﻲ فترة ﺯﻣﻨﻴﺔ ﻳﺤﺪدﻫﺎ ﺻﺎﺣﺐ اﻟﻄﻠﺐ (مطلوبة للتقديم لفيزا شنجن ما عدا سفارة فرنسا لا تحتاج شهادة تحركات). و يتم اصدارها من مجمع التحرير وبتاخد تقريبا اسبوعين عمل ولازم تكون موثقة وتقدمها مترجمه بلغه السفاره منمكتب ترجمة معتمد.

8- صور شخصية

بتقدم صورة شخصية حديثة, ولها شروط يجب توافرها فى الصوره لتكون مقبوله فى السفاره, على سبيل المثال :

1/ يتم التصوير على خلفية بيضاء أو أبيض غامق.
2/ يجب ألا يتسبب وضع الخاضع للتصوير والإضاءة في ظلال مشتتة على الوجه أو الخلفية
3/الأفضل أن يكون تعبير الشخص الخاضع للتصوير محايداً بلا ابتسام

تقدر تشوف جميع الشروط الواجب توافرها وامثلة عليها من خلال اللينك ده.

9- مستند الغرض من الزياره .

لو رايح شغل او زياره لازم تجيب الدعوة من الشركه او المعرض او الناس الى رايح لهم و دى حاجه هما الى بيبعتهالك. اما لو غرض الزياره هو السياحه في الحاله دى حجز الفندق كافى و ساعات بعض السفارات بتطلب برنامج الرحله وخطه الانتقالات اللى ناوى تزورها فى البلد وحجزوات الفندق .